So… dis uiteindelik Desember. Platteland
wys al in fliekteaters landswyd en die terugvoer is absoluut
ongelooflik. Die fliek het reeds talle rekords gebreek! As jy nog
nie kans gekry het om dit te gaan kyk nie, toemaar – jy’s nie alleen
nie, ek het self nog nie! Ek het die premiêr misgeloop, as gevolg
van TREE AAN! vertonings en van toe af was dinge mal, so
hopelik sien ek myself darem op die “big screen” voor dit te laat
is.
Terwyl ons nou toneelspeel gesels – baie dankie vir al die
ongelooflike terugvoer oor Hartland en Tree Aan.
Volgende jaar lê daar nog meer interessante rolle vir my voor in
Getroud met Rugby en Deon Opperman se nuwe Afrikaanse treffers
musiekspel, Lied van my Hart. Ek sien baie uit!
Wat my musiek betref – ek’s besig om te werk aan my nuwe album wat
hopelik in Maart/April 2012 uitgereik gaan word. Ek skryf ook vir ʼn
paar opwindende projekte wat voorlê… maar ek mag nog niks sê nie, so
hou hierdie spasie dop! Een projek wat nou afgehandel is, is die
skryf en vervaardiging van Platteland se temalied, Bring
Als Wat Jy Het. Sean Else (Regisseur van Platteland ) het
my gevra om ʼn duet vir Steve Hofmeyr en Bok van Blerk te skryf, en
liedjie en musiekvideo, is op die Platteland klankbaan en YouTube
beskikbaar. Ek sal seker maak om terug te antwoord op julle
boodskappe – jammer dit gaan so stadig partykeer – dinge raak so
besig, ek kry amper nie tyd om asem te haal nie… maar ek vergeet nie
van julle nie!! En ek waardeer elke boodskap!
Laastens, as jy 9 Desember (Vrydag)
in die Kaap is – ek het ʼn vertoning by
Dorpstraat Teater in Stellenbosch. Sal baie lekker wees
om julle almal daar te sien!
Baie dankie vir jul volgehoue ondersteuning in 2011. Sonder julle
ondersteuning beteken my werk niks. Ek waardeer dit opreg! Ek wil
ook vir elkeen ʼn Geseënde en veilige Kersseisoen toewens.
